Beyanatê Komîsyonê Ziwan, Kultur û Hunerî:
Ma 15ê Gulane ke bi têkoşînê estbîyayîşê şarê kurdî dest pêkerdo û ewro pêro dînya de sey Roşanê Ziwanê Kurdkî yeno fîrazkerdiş, daraxêko tarîxî de pêşwazî kenê. Nê proseso ke serra 1932yî de Şam de bi pêşengîya Celadet Alî Bedirxanî dest pêkerdo, seba heqê xebitnayîş, averberdiş û perwerdeyê bi ziwanê dayîke yo ke şarê kurdî bi serranê dergan o ra mehrûm mendo, nîşanê yew dewrê krîtîkî keno.
Ziwanî; erjê bingeyîn ê ke vîr, kultur û cuyeya hempare ya şaran kirişenê yê. Ziwanê dayîke, îfadeyo tewr xurt ê nasnameyê şaran o. No ser zî azadîya ziwanî, tenya binê manayê kulturî de nîyo, eynî wext de bingeyê ciwîyayîşî yê seyyewbînanî, demokratîke û heqê tewrbîyayîşê sîyasî yo zî.
Kurdkîya ke ziwananê Mezopotamya yê tewr qedîman ra yew a, rîyê polîtîkayanê yewperest û cîyakeran ê dewletanê neteweyîyan ra bi serranê dergan binê zextî de mendo, bi mîlyonan merdimî heqê perwerdeyê bi ziwanê dayîke ra mehrûm ameyê veradayene. Nêşinasnayîşê heqê ziwanê dayîke, ewro zî mîyanê sebebanê muhîman ê pêkewtişanê komelkîyan de ca gêno û dewam keno.
Aştîya komelkîye, tena bi xurtkerdişê erjanê demokratîkan û pêameyişê komelkîye mumkun a. Şinasnayîşê heqê perwerdeyî yo ke şarê kurdî yo ke Sûrîye/Rojawan de ciwîyêno bi têkoşîn qezenc kerdo û averberdişê prosesê komelê demokratîkî yê Tirkîya, yewbînan rê girêdaye yê. Binê garantî nêgirewtişê heqê perwerdeyê bi ziwanê dayîke, tena seba şarê kurdî nê, seba pîya-ciwîyayîşê heme şaranê Rojhelatê Mîyanênî zî yew rîsko cîddî dano arê.
Vengdayîşê cuye yo hemparî yo ke 27ê Sibata 2025î de Birêz Abdullah Ocalanî kerd, seba ameyîşê têhetî yo şaran ê binê yew zemîno seyyewbînanî û demokratîk de, yew perspektîfo tarîxî pêşkêş kerdo. Ganî TBMM, sey îcabê pêameyişê komelkîye, heqê perwerdeyê bi ziwanê dayîke yo ke heqêko nêdîyêno cîya kerdene yo, binê garantî bigêro; warê gelemperî û dezgehanê fermîyan de xebitnayîşê kurdkî yo azad bîyaro ca.
Waştişê ma yo "Statuyê Kurdkî, Perwerdeyo Bi Kurdkî" heqo tewr meşrû û xoza yê şarê kurdî yo. Şaro ke wayîrê ziwanê xo yê dayîke vejîyêno, eynî wext de nasname, vîr û ameyoxê xo zî paweno.
Nê rojê manîdar de, ma pêro cinîyan, ciwanan, karkeran û roşnvîranê ke seba ciwîyayîşê ziwan, kultur û nasnameyê ma têkoşîn danê rê veng danê; wa bibê hêzê awankerdene yê komelêko demokratîk û nê berpirsîyarî zî bigêrê xo ser. Ma înan dawet kenê ke bi nê hişmendîye dormereyê "ziwanê dayîkê yê kurdkî" yo ke erjêko hempar ê komelê demokratîkî yo de bibê yew, komelbîyayîşî biafêrnê û komelê demokratîkî pîya awan bikerê. Bi dirûşmê: “Statuyê Bi Kurdkî, Perwerdeyê Bi Kurdkî’ ma Roşanê Ziwanê Kurdkî Celadet Alî Bedirxan û heme xebatkaranê ziwanê Kurdkî û şarê Kurdî rê pîroz kenê.
Komîsyonê Ziwan, Kultur û Hunerî yê Partîya DEMî
15 Gulane 2026